Max und Moritz op Kölsch 

E Wöödche vürher

Enä, wat muß mr üvver freche 
Puute off schänge oder spreche! 
Wie zom Beispill hee vun denne, 
Die sich Max un Moritz nenne; 
Die, anstatt dat se jet liehre 
Un op äldere Lück zo hüüre, 
Nor em Stelle drüvver laache 
Un de Aap met denne maache. 
Bei jeder Lotterbooverei, 
Jo, do sin se flöck dobei! 
Große Lück zo schekaneere 
Un zo ärjere Minsch un Deere, 
Äppel, Birre, Prumme kläue 
Un sich noch do drüvver freue,
Dat se frech sin un stibizze 
Statt dat se brav sin un still sitze 
En dr Schull un passen op - 
Enä do kummen die nit drop. 
Ävver wei, owei, owei!
Wie jingk am Engk et denne zwei! 
O jömmich nä, dat muß mr saage, 
Die komen noch um Kopp un Kraage. 
Dröm es hee, wat se gedrivve, 
Avjemolt un opjeschrivve.
.
Max un Moritz op Kölsch von Ernst Pilick. Auszug aus: Wilhelm Busch - Max und Moritz. Eine Bubengeschichte in sieben Streichen. In deutschen Dialekten, Mittelhochdeutsch und Jiddisch herausgegeben, eingeleitet und mit einer Bibliographie versehen von Manfred Görlach. Helmut Buske Verlag Hamburg 1982

Aus
Festschrift für Ernst Pilick 
zum siebenundsiebzigsten Geburtstag
Verlag Peter Guhl
ISBN 3-930760-77-0